Pigkoronahan an pambato kan Pilipinas na si Dia Maté komo Reina Hispanoamericana 2025 sa coronation night na pigsagibo sa Santa Cruz, Bolivia ngunyan na Lunes, Pebrero 10, oras sa Pilipinas.
Nadaog kan Pinay beauty queen an 24 na iba pang kandidata sa international competition asin ipinasa sa saiya an korona gikan ki 2023/2024 winner Maricielo Gamarra kan Peru. Sa finals ng pageant, pig-rampa ni Maté an saiyang gold gown na pigdisenyo ni Rian Fernandez.
Apwera sa major crown, naipuli man kan Filipina beauty queen gikan Cavite an Best in National Costume award kun saen pigsulot kaini an Ehrran Montoya dress na hango sa Baroque Churches kan Pilipinas.
Si Maté na an ikaduwang Pinay beauty queen na nagtrayumpo komo Reina Hispanoamericana makalihis an enot na kapangganahan ni Winwyn Marquez sa nasambitan ng title kan 2017.
An pinay pride na si Maté an saro man na singer-model asin an nobiya kan sikat na singer na si JK Labajo.
Enot na nagsabak si Maté sa 2025 Miss Universe pageant kun saen nakaresiber ini nin special title gikan sa sarong sponsor alagad dae ini nanggana.
Mientrastanto, pigproklama man komo 1st runner up si Miss Colombia, 2nd runner up si Miss España, 3rd runner up si Miss Perú, 4th runner up si Miss Brazil asin 5th runner up si Miss Polonia.
