Pighurot kan pamilya kan apat na soboot mga biktima kan Duterte drug war sa National Bureau of Investigation(NBI) na imbestigaran an soboot mga serye kan online harassment na parehong ipinupukol sa sainda.
Pigtabangan kan National Union of Peoples’ Lawyers (NUPL) an mga pamilya tanganing pormal na hagadon sa NBI an sarong masusing imbestigasyon na orog na naglulubo puon kan inarestar si dating Presidente Rodrigo Duterte, haros sarong bulan na an nakakalihis.
Sigun sa National Union of Peoples’ Lawyers, an mga serye kan pag-atake an ginagamitan kan manlaen-laen na mga paagi siring kan mga edited picture, gibu-gibong mga esturya, hate speech, disinformation o fake news, asin iba pa na parehong pigbibilog tanganing raoton an pamilya kan mga biktima.
Apwera sa mga biktima, kaiba man soboot sa mga nakakaresiber nin mahewasang online harassment an mga abogadong kumakatawan sa sainda.
Nagtutubod an National Union of Peoples’ Lawyers na an mga nagsasagibo kan nasambitan ng harassment an pawang mga supporter kan kampo ni dating Pres. Duterte asin mga bayarang troll na pawang nag-aatake sa gabos na dae nagpapabor sa saindang pagtubod o paninindogan.
Pagsisierto kan grupo kan mga abogado, na dae sinda matuninong asin pipiritong labanan an serye kan mga harassment asin online disinformation, gamit an katotoohan.
Duon kan grupo, nagibo nindang magtabang tanganing dagusang maarestar an dating presidente asin dae ini mauntok hasta dae naihahatod an hustisya.
