NAGA CITY- Dawa na namumundo asin nanghihinayang na dae nakua kan Pilipinas an titulo sa Miss Universe, nagtitinir pa nanggad na proud asin maugma an pamilya ni Bb. Pilipinas-Universe Rachel Peters sa ciudad nin Naga asin sa probinsya nin Camarines Sur.
Makalihis na dae makalaog sa Top 5, tulos na nagpasalamat an tiya ni Rachel sa paagi kan Bombo Radyo Naga sa gabos na mga nagsuporta sa Bicolana Beauty.
Sigon ki Gloria Obregon, napag-olayan na kan saindang pamilya na dawa anong maging resulta kan kompetisyon, si Rachel pa nanggad an magiging Miss Universe sa sainda asin sa bilog na nasyon.
Mientrastanto, nagpasalamat man ini sa mga Pinoy na nagtao suboot nin kusog boot sa daraga hasta sa maabot kaini an Miss Universe journey.
Dawa napaamay an exit sa pageant, nagtitinir na pano nin supporters an free viewing venue kan pamilya Obregon sa ciudad nin Naga.
Enot kaini, pighayag man kan tiyo kan Bicolana beauty na ‘win or lose,’ si Rachel pa nanggad an matinir na Miss Universe sa saindang puso.
