NAGA CITY- Dismayado an pamilya ni Senador Leila de Lima makalihis dae paboran kan Korte Suprema an kahagadan na mabaliktad an enot na ruling na nagsasabing may diretsos an lower court para sa drug cases na kinakahampang kaini.
Sa entrevista kan Bombo Radyo Naga ki Kagawad Elma Gaspi, pinsan ni Senator De Lima gikan sa syudad nin Iriga, Camarines Sur, sinaysay kaini na labi an saindang kamunduan sa nagin desisyon kan nasambitan ng korte.
Sigon ki Gaspi, an hiling kan mga tao ki De Lima, sarong dakulang huma sa gobyerno kung kaya dawa ano an gibuhon ninda, dae pinapaboran kan korte.
Dugang pa kaini, nasa democratic country sinda alagad dae soboot ninda namamatean an demokrasya sa sitwasyon ni De Lima.
Katakod kaini, sigon ki Gaspi, pinagpapasa-Diyos na sana ninda an gabos na mga nangyayari sa opisyal mantang pinag-aadalan naman soboot kan mga abogado ni De Lima an mga sunod na lakdang katakod kan nasambitan ng desisiyon.
Enot kaini, sinaysay kan kampo ni De Lima na iligal an pagpapaaresto sa senadora kan kamara baja huli ta para ki De Lima, Ombudsman an dapat na nagkakapot sa kaso, urog na ta pamayo siya kan DoJ kan mga panahong ito.
