Pigsuspinder kan FIFA an soccer federation president kan Panama na si Manuel Arias makalihis kaining apudon na mataba an sarong star player kan saindang national team.
Huli digde, pagbabawalan na si Arias na pamayuhan an Panamanian Football Federation na bistado sa apod na Fepafut sa laog kan anom na bulan.
Dae man ini pwedeng magbali sa mga football practice asin iba pang aktibidad na sakop kaini.
Basado sa opsiyal na report kan FIFA, nangyari an body shaming comment makalihis kaining apudon na mataba si Panama women’s national team star player Marta Cox.
Dae kaya nag-uusad an nasambitan ng team sa international tournament ka nakalihis na taon kun saen sinaysay nin Cox na an pinakadakulang problema kan koponan an kawaraan nin bastanteng pasilidad.
Tulos man ining pigbatikos ni Arias asin sinabihan an star player komo mataba, napabayaan na an sadiri, asin dae na gayong nakakahiro sa filed.
Naggibo si Cox nin historya sa Panama kan nakalihis na taong-2023 makalihis ilaog an primerong goal kan Panama sa Women’s World Cup.
Alagad sigun ki Arias, mayong aram si Cox manungod sa football program kan Panama sa laog kan pirang taon.
Tulos man na pigbatikos ni Cox an mga komento kan saindang football president asin nagbantang mahali ini sa national team kun nagpadagos an siring na komento gikan ki Arias.
