NAGA CITY- Pormal nang piglunsar kasuudma, Hulyo 22, 2025 an panduwang Gulayan sa Lungsod sa Barangay Bagumbayan Sur.
Obheto kan nasambitan ng programa an masustenaran an food security sa ciudad nin Naga, katakod kan selebrasyon kan Nutrition Month ngunyan na bulan nin Hulyo.
An esfuerzo na ini an nagin posible sa paagi kan pagtarabangan kan gobyerno lokal kan Naga sa paagi kan City Agriculture Office, City Population and Nutrition Office, asin City Youth Officials kaibahan an Department of Agriculture Regional Field Office V asin Barangay Council kan Bagumbayan Sur.
An nasambitan ng mga lokal na ahensiya an namayo tanganing maisakatupadan an programa na igwang bitbit na marhay na kalakawan para sa mga residente kan nasambitan ng lugar.
Katakod digde, an programa soboot na ini an enot nang nagkaigwang launching sa Barangay Abella kan Hulyo 21 asin nakatalaan na isagibo an masunod na launching sa Barangay Cararayan sa maabot na Hulyo 29.
Target kan programa an makapag-distribwer nin mga seedling na pwede sanang maitanom sa mga container sa laog kan harong, orog na ngunyan na nagsasadit an espasyo kan tanuman.
Prayoridad pa kan programa na matawan an kada harong nin mga inaning gulay orog na sa igwang mga malnourished na aki asin sa vulnerable sectors na dakulang tabang sa saindang salud.
Sa ngunyan, dagos-dagos soboot an mga nasambitan ng opisina sa pagbilog nin mga programa na makakatabang sa komunidad.
