Nangapodan an Palasyo ng Malakanyang sa Senado na dagugon an pangapodan kan business community na rekasan an impeachment trial ni Vice President Sara Duterte para mamantinir an katatagan kan ekonomiya asin kumpiyansa kan mga investors na mamuhunan sa satuyang nasyon.
Sigun ki Palace Press Officer Usec. Claire Castro, mismong mga nasa business sector na an naaalarma sa pagdelay sa impeachment trial kaya dapat aksiyunan na ini kan Senado.
Sinaysay ni Castro na dae talaga gugustuhon kan mga investor na mag-invest kan negosyo sa nasyon kun an sarong lider an inaakusaran kan korapsyon asin garo kinakampihan pa kan pirang mga senator- judges.
Pinahimutikan man ni Castro an nagin pahayag ni VP Sara na bagsak an ekonomiya kan Pilipinas. Tinawan-duon ni Castro na nagmamarhay ngunyan an dalagan kan ekonomiya kan nasyon.
Dakulang tabang digdi an pagtanggal kan Pilipinas sa grey list kan Financial Action Task Force na suboot nakapagtao nin halangkaw na investor confidence.
Ibinida man ni Castro an report kan Asian Development Bank (ADB) na-ma maintain kan Pilipinas an magayon na economic outlook kan nasyon para sa taong 2025.
An pahayag na ini ni Castro an tugon sa nagin pahayag ni House Impeachment Spokesperson Atty. Antonio Audie Bucoy na pwedeng maaapektaran an investor confidence kun masyadong mahahaluyan an proseso sa impeachment ni Vice President Sara Duterte.
Mientrastanto, nirerespeto kan Malakanyang an pangapodan kan business community na rikasan an impeachment trial ni VP Sara.
Apwera kaini liwat tinawan-duon ni Usec Castro na dae mangingiaram si Presidente Marcos sa impeachment process sa Senado.
Alagad mawot ni Presidente Marcos na sundon kan senado an Konstitusyon asin rule of law dapit sa impeachment.
