NAGA CITY- Nagsuko an duwang pigtutubudang mga miyembro kan rebeldeng New People’s Army (NPA) asin limang mga courier suboot kaini sa manhamiento kan 4th Infantry Battalion (4IB) asin sa Philippine National Police (PNP) sa Occidental Mindoro.
Sa nagunong impormasyon kan Bombo Radyo Naga hale sa 2nd Infantry Division, Philippine Army, napag-araman na miyembro kan Kilusang Larangang Gerilya Silangan, Sub- Regional Military Area (SRMA) 4D, Southern Tagalog Regional Party Committee (STRPC) na nag-ooperar sa Mindoro an nagsukong duwang NPA asin limang mga couriers.
Nagdesisyon suboot an mga rebelde na magsuko na sa gobyerno huli sa labing pagsakit asin gutom na saindang naeksperyensyahan sa bulod mantang nagtatago sa tropa kan gobyerno.
Susog pa sa mga nagsukong limang mga couriers suboot kan rebeldeng grupo, nabugtak sa peligro an saindang buhay huli sa pagsuporta kan mga ini sa NPA kaya man nagdesisyon na sindang magbalik loob sa gobyerno asin malinig an saindang pangaran sa mga otoridad.
Sa ngonyan, pig-aandam na kan gobyerno an paglaog sa mga nagsukong rebelde sa Enhanced Comprehensive Local Integration Program (E-CLIP) para matabangan sinda na makapagbagong buhay.
Enot kaini, sampulong mga rebeldeng NPA man an nagsuko kan nakaaging semana sa manhamiento kan Philippine Air Force sa Nasugbu, Batangas.
Sa suway na entrevista man ki Capt. Patrick Jay Retumban, chief kan Division of Public Affairs Office (DPAO) kan 2ID, sinaysay kaini na naglalaom sinda na madudugangan pa an numero kan mga NPA na masuko sa gobyerno.
