Laoman liwat an panibagong rollback sa presyo kan mga produktong petrolyo sa masunod na semana.
Ini an kasunod kan duwang beses na pagpapautob kan dakulang umento sa presyo kan langis sa huring parte kan nakalihis na bulan.
Sigun ki Energy Oil Industry Management Bureau Rino Abad, piglalaomang magkakaigwa nin rollback na labi P1 kada litro sa gasolina, mantang nasa P0.50 kada litro man an piglalaomang magigin tapyas sa diesel.
Sa kerosene man, piglalaomang magkakaigwa nin bawas presyo na P0.80 kada litro.
Ini an basado pa sana sa international petroleum trading sa nakalihis na apat na aldaw asin pwede pang magbago basado sa trading kasuodmang aldaw nin biyernes.
Pigkokonektar pa man giraray an pagbaba kan presyo kan langis sa padagos na pigpapa-iral na ceasefire sa pag-ultanan kan Israel asin Iran.
Piglalaoman na iaanunsyar kan mga kompaniya nin langis an opisyal na presyo sa aldaw nin Lunes asin magigin epektibo sa aldaw nin Martes, Hulyo 8, 2025.
