Tensionado giraray an relasyon kan Presidente kan Estados Unidos na si Donald Trump asin ni Papa Leo XIV npagkatapos na an presidente liwat na nag-atake sa Papa sa social media, na inaapod siyang sarong “hyper-liberal partisan” asin pigkukwestyon an saiyang kredibilidad bilang sarong papa.
An patutsada naggigikan sa magkakontrahan na mga pananaw sa gera sa pag-ultanan kan Estados Unidos asin Israel laban sa Iran, na temporaryong napundo kan sarong “maluyang untok-putok.”
Sa serye nin mga post sa online, ipinahayag ni Trump an sinabi niyang mga lumang pahayag na ginibo kan Santo Papa bago siya napili, na ginagamit an pangaran na Robert Prevost. Base sa mga screenshot na naglilibot, an Papa sinasabing kritikal sa polisiya na “America First”, siring man ki Trump asin U.S. Vice President JD Vance, orog na sa imigrasyon, gun control, asin iba pang isyu.
An social media account suboot pinara kan aldaw na siya naelihir na papa, na nagdara sa espekulasyon na pinara na niya an saiyang mga nakaaging pahayag.
Si Pope Leo dai direktang nagsimbag sa mga bagong pag’atake ni Trump. Magigiromdoman na enot na kinondenar kan Santo Papa an nasabing giyera, na inaapod ining “atrocious” asin “inhuman.”
Sa ibong na lado, sa saiyang pagbiyahe hale sa Algeria pasiring sa Cameroon bilang parte kan saiyang 10 aldaw na pagbisita sa Aprika, pigduon kan Santo Papa an importansya kan paggalang asin pakikipag-ulay sa ibong kan pagkakaiba sa pagtubod.
Segun ki Pope Leo, posibleng mamuhay nin matoninong an mga tawo dawa magkaiba an saindang relihiyon, paagi nin pagsamba, asin estilo nin pamumuhay.
Sa sarong separadong post, nag-insistir si Trump na an banta hale sa Iran dai dapat pagmenuson, huli sa rinibong nagadan na nangyari na siring man an peligro kan pagkakaigwa kaini nin mga nuckear arms.
Si Pope Leo XIV mamarkahan nin sarong taon sa Mayo bilang lider kan 1.4 bilyon na miyembro kan Simbahan Katoliko. Pagkatapos kan toninong na enot na mga bulan kan saiyang liderato, nagin mas boses siya kasuarin pa sana, partikularmente sa saiyang kritisismo sa nagpapadagos na gera sa Middle East.
Sa sarong entrevista, sinabi kan Santo Papa na ipadagos niya an saiyang kritisismo sa giyera sa ibong kan mga pahayag ni Trump. Mientrastanto, pigduon ni U.S. VP JD Vance na dapat magin maingat an Santo Papa sa saiyang mga pahayag dapit sa mga isyung may kinaaraman sa giyera.
