Pighihiling ngunyan kan Presidential Anti-Organized Crime Commission (PAOCC) an pagpapadeport sa labi sa 1,000 mga Philippine Offshore Gaming Operations (POGO) workers sa laog sana nin 2-3 semana.
Sigun ki PAOCC Executive Director Gilbert Cruz, an mga POGO workers na ini iyo an mga nakaditene sa irarom kan kustodiya kan PAOCC temporary detention facility sa Pasay City.
An nagkapira kaya sa mga ini ay an mga nagsasairarom sa dialysis asin man pigpapabulong huli man sa HIV asin pirang mga helang kaya naman pighihiling kun makakayanan na maiproseso na an deportasyon kan mga nasambitan ng POGO workers nin huli ta saro saro kayang kaipuhan na bugtakan nin dokumento an mga trabahador nin huli ta kadaklan sa mga nadakop asin nagtitinir sa pasilidad iyo an mga mayo nin pasaporte.
Mientrastanto, dugang man ni Cruz, an mga kaso kan mga deportees na mayong pasaporte an pigrani na kan ahensya sa mga embhada tangani na matawan nin one-time travel document pabalik sa saindang kanya-kanyang mga nasyon.
