NAGA CITY- Arestado an sarong paraoma makalihis an ipigkundusir na anti-illegal drug operation kan mga otoridad sa Barangay South Villazar, Sipocot, Camarines Sur.
Binisto an suspek na si Arnel Abaquita alyas Pogi, 50-anyos.
Enot kaini, inimplementar kan mga kabuhan kan Sipocot-PNP sa pakikipagtabangan sa 3rd Maneuver Platoon kan Camarines Sur Provincial Public Safety Company an mandamiento de rekisa kontra ki Abaquita na nagresulta sa pagkakaarestar digdi.
Nakumpiskar sa posisyon kan suspek an sarong kahon nin sigarilyo na naglalaog nin tulong pakete nin pinagtutubudang shabu, 12 pidaso nin mayong laog na plastic sachet, kahon nin antipara na naglalaog nin anom na aluminum foil na may pinagtutubudang shabu residues, lighter, cellphone, sarong dae pa maaraman na kalibre nin badil asin walong bala.
Binitbit si Abaquita sa istasyon kan pulis tangani na sangatan nin magkasuon na kasong pagbalgar sa RA 9165 o an Comprehensive Dangerous Drugs Act of 2002 asin RA 10591 o an Comprehensive Law on Firearms and Ammunition.
