Liwat na pigtawan duon kan sarong abogado an importansya kan parental authority o an kapangyarihan asin responsibilidad kan mga magurang na padakulaon, protehiran, asin giyahan an saindang mga aki sosog sa Family Code of the Philippines.
Sa entrevista kan Bombo Radyo Naga ki Atty. Anne Berja (Civil and Criminal Lawyer), sinabi kaini na an awtoridad kan magurang natural na itinatao sa duwang magurang kun sinda legal na kasal. Kaiba digdi an pagtao nin moral, emosyonal, pinansyal, asin pisikal na suporta sa mga aki.
Sa pangyayari na an mga magurang mayo o dai kayang mag-otob kan saindang mga trabaho, igwa nin inaapod na substitute parental authority kun saen an mga lolo asin lola, mga matuang tugang, o iba pang mga paryentes an pwedeng magsalida sa saindang lugar susog sa establisadong hirarkiya kan ley.
Sa mga bagay na may kinaaraman sa pag-ataman sa aki, an “Tender Years Doctrine” nagdadanay na epektibo, kun saen an sarong aki na mayo pang pitong taon sa pankagabsan dapat na magdanay sa pag-ataman kan ina, apuwera sana kun mapatunayan na bakong angay huli sa kapabayaan, inmoralidad, o iba pang seryosong mga dahelan.
Mientras tanto, kun an aki lampas na sa edad na pitong taon, mayo na nin automatic presumption pabor sa ina. Imbes, an korte madesisyon basado sa “pinakamarahay na interes kan aki,” kaiba an emosyonal na kamugtakan, seguridad, edukasyon, asin dawa an sadiring kamawotan kan aki.
Dugang pa ni Berja na an pagdisiplina sa aki kabtang kan autoridad nin magurang, alagad dai iyan maninigong magbunga nin pag-abuso o pagbalga sa dignidad kan aki. Mientrastanto, an Department of Social Welfare and Development (DSWD) pwede sanang mag-interbenir asin magkua nin kustodiya kun mapatunayan na binayaan, pinabayaan, o nasa peligro an aki. Bago makaabot sa korte an iriwal sa pamilya, ineenkaminar an mga magurang na mag-agi nguna sa barangay conciliation, family mediation, o counseling.
Sa kaso nin legal na pag-ampon, an legal na relasyon sa pag-oltanan kan biolohikong mga magurang asin kan aki biyong naputol asin an autoridad nin magurang ibinabalyo sa mga magurang na nag-ampon.
Lininaw man na dae nawawaran nin parental authority an mga magurang na nagtatrabaho sa abroad, arog kan mga OFW dawa temporaryong iwawalat an aki sa pangataman kan mga lolo asin lola o iba pang paryentes. Alagad, nagdadanay an saindang obligasyon na suportaran an aki.
An mga magurang inaabisuhan na mag-andam nin supisyenteng ebidensya kun gusto nindang patunayan na an ibang partido “bakong angay” sa sarong kaso nin kustodiya. Kaiba digdi an prueba nin kapabayaan, nakaugalean na pagburat, o grabeng inmoralidad. Sa mga kaso na may relasyon sa violence against women and children o VAWC, importante man na mag-file nin separadong aksyon para sa custody asin financial support para maseguro an karahayan kan aki.
