NAGA CITY- Dagos-dagos an santa misa na pigkukundusir sa parokya kan San Francisco sa siyudad nin Naga ngunyan na Undas.
Sa entrevista kan Bombo Radyo Naga ki Nora Viñas, Church Usher kan San Francisco Parish, sinaysay kaini na ngunyan na aldaw igwang nakatalaan na misa atyan na alas 5:30 nin hapon asin alas 6 nin bangi siringman igwang isasagibong misa sa aga aldaw nin Domingo.
Sigun ki Viñas taon-taon tuyong Undas kadakol an nagsisimba sa parokya orog na ta an simbahan an pig-aagihan sana kan mga tawo.
An mga nagkapira digde nag-aalay kan saindang pagpapangadyi sa mga kapamilya na enot namang nagtalikod sa kinaban.
Katakod kaini, pigsaysay man ni Viñas na igwang pamisa para sa mga kalag ngunyan na Undas.
Kaipuhan sana na magkua nin sobre, darahon sa opisina asin ihulog sa box saka ini mimisahan.
An nasambitan ng pamisa para sa kalag an available hasta sa Nobyembre 2, 2025.
Sa ngunyan, hagad na sana kaini an matuninong asin solemneng pag-obserbar kan Undas ngunyan na taon.
