Suportado ni House Speaker Faustino “Bojie” Dy III an desisyon ni Ombudsman Jesus Crispin Remulla na halion an restrictions sa pagsasapubliko kan Statements of Assets, Liabilities and Net Worth (SALN) kan mga taga-gobyerno.
Huli digde, sinaysay ni Dy na nakatalaang i-review kan House of Representatives an panundon katakod sa pagluluwas nin SALN.
Sigun ki Dy, bukas diigde an mga miyembro kan Kamara asin saindang pag uulayan an pormal na proseso dapit digde mantang nasa Congressional break, tangani makapagluwas sinda nin malinaw, transparent, asin consistent na mga panundon.
Sigun ki Dy, marahay na maibalik an dating nakagawian na bukas sa publiko an SALN kan mga lehislador. Preparado man si Dy na mangenot o magin halimbawa sa paglalantad kan saiyang SALN kun kaipuhan.
Mientrastanto, prepararong isapubliko ni Presidente Ferdinand Marcos Jr., an saiyang Statement of Assets, Liabilities, and Net Worth (SALN) enkaso na hagadon ini kan Independent Commission for Infrastructure (ICI) o kan Office of the Ombudsman.
Ginibo mismo kan Presidente an pahayag makalihis halion kan Ombudsman an mga limitasyon sa pag-access kan publiko sa SALN kan mga opisyal kan gobyerno.
Sigun sa Presidente, susunudon ninda an mga dating panundon sa pagluluwas nin SALN na ipinauntok kan administrasyong Duterte. Iinkaminaron man kan Presidente an saiyang mga Gabinete na gibuhon an kaparehong aksyon.
