Aram baya nindo mga kaBombo, kinumpirmar kan mga mananaliksik an pagkakadiskubre kan sarong pambihirang kolor kahel na nurse shark na may puting mga mata sa baybayon kan Costa Rica na kun saen pigkokonsiderar na priemerong kaso kan siring na klase sa Caribbean.
Nadakop an anom na talampakang pating sa sarong sport fishing trip harani sa Tortuguero National Park, sa rarom na 37 metro.
Pinagtutubudang igwa ining xanthism, sarong kondisyon sa pigmentation na nagkakawsa nin yellow o gintong kolor huli na man sa kakulangan nin red pigment.
Karaniwang kayumanggi an nurse shark tangani makapagtago sa seabed, algad sigun sa mga siyentipiko, mas lantad asin man mas marikas ining mabiktima kan mga mandaragat huli man sa kakaibang kolor asin mapuputing mata.
Sigun sa Federal University of Rio Grande, ini na an primerong nairehistrong kaso nin xanthism sa mga cartilaginous fish siring na sana kan pating, ray, asin skate. Nagpahiling man an pating nin katangian kan albinism.
Posibleng kawsa ini kan genetic mutation, diyeta, o kapalibutan an kondisyon. Pighurot pa kan mga eksperto an pangangaipuhan nin mas hararom na pag-aadal sa genetics kan mga pating sa rehiyon.
An xanthism an pigkokonsiderar na napakabihira asin didikit sana an nairehistrong kaso sa manlaen-laeng hayop.
