Sinuspinde kan Philippine Basketball Association (PBA) an referee na si Jeff Tantay huli sa nakaligtaang foul call sa nagin laban kan TNT Tropang 5G asin Meralco Bolts kan nakalihis na aldaw nin Miyerkules, Enero 14, 2026.
Sigun ki PBA Commissioner Willie Marcial, nabigo si Tantay na mag-apod nin foul kontra ki Calvin Oftana (TNT) sa clutch time kan Game 5 sa TNT-Meralco semis series.
Nagluwas na natapik ni Oftana an shooting hand ni CJ Cansino (Bolts) mantang pigporbaran kan huri na maglaog nin sarong field goal sa huring siyam na segundo kan nakalihis na laban.
Kapot kaidto kan Tropang 5G an 1-point lead, 97-96, asin makalihis an missed foul call, dagusan nang ibinulsa kan nasambitan ng koponan an kapangganahan, 99-96, rason tanganing makua kaini an enot na finals berth sa PBA Season 50 Philippine Cup.
Makalihis an laban, kinuwestiyon kan Bolts an kabiguan ni Tantay na mag-apod nin foul asin tulos man na inaksiyunan kan liga.
Sigun pa ki Marcial, pagdedesisyunan pa kan Commissioner’s Office kun an suspension ni Tantay an para sana sa nagkapirang game o sa kabilugang conference kun saen an best-of-seven finals an nakatalaan na masunod na semana.
Kun bebweltadahan an nagin bakbakan, naglaog si Cansino nin career-high 36 points asin pinangenotan an Bolts gikan sa 10-point deficit tanganing dagusang ibulsa an lead, 96-91, 27 segundo antes matapos an laban.
Sa saiyang 36 points, 17 an nagibo kaining ilaog sa 4th quarter.
