Nagpromisa si Presidente Ferdinand Marcos Jr. na itatao an saiyang bilog na suporta sa mga atletang Pilipino makalihis na opisyal kaining buksan an ika-65 Palarong Pambansa sa Ferdinand E. Marcos Sr. Memorial Stadium sa Laoag City, Ilocos Norte, Sabado nin pagkabangi.
Nangapudan si Presidente Marcos sa mga grade school asin man secondary student-athletes na itao an gabos kan saindang makakaya.
Soboot, marahay kaya na halimbawa an mga atleta na ini sa iba pang kabataang Pilipino na may pangaturugan sa buhay asin man determinasyon tangani mautob an mga ini.
Soboot, sinda na yaon sa gobyerno, hasta sa maabot kan saindang makakaya, gigibuhon an gabos tangani orog pa na matabangan na magin marahay na parakawat sa nasyon.
Sinaysay pa kan Presidente na madaog man o manggana, kinokonsidera na kaini an mga estudyante komo mga ‘kampeon’ huli man sa saindang kahanga-hangang mga kasanayan sa palakasan asin man dedikasyon tangani mag trayumpo.
Importante pa soboot na manudan an disiplina, an importansya kan pakikipag amigo asin man mag-enjoy sa mga paboritong sport.
Kaya man an pangapudan pa ni Presidente Marcos sa mga atleta ay pangatamanan an saindng salud asin man ipagpadagos na makua an mga pangaturugan hasta sa sinda ay magin matrayumpo. Sa futuro, nagkapira sa mga ini posible na magin kinatawan kan nasyon sa international competitions.
Sa ibong man na banda, tampok sa Palarong Pambansa ngunyan na taon an 24 regular sports, kabali na an ‘athletics, basketball, volleyball, gymnastics, taekwondo asin swimming.’ An Weightlifting ay pinapabisto komo demonstration sport, mantang an kickboxing, girls’ football at girls’ futsal ay gigibuhon man komo exhibition events.
Sarong special category para sa mga atleta na may kakundian an tinawan duon sa events, ini an para-athletics, para-swimming, bocce asin man goalball. Igwa man nin 15,000 delegado gikan sa 20 athletic associations, kabali na an 18 rehiyon sa nasyon, National Academy of Sports asin Philippine Overseas Schools, an mapartisipar magpuon Mayo 25 hasta petsa 30.
Igwa nin temang, “Nagkakaisang Kapuluan” (United Archipelago), an taunang national scholastic competition ay obheto na mag-promote nin physical education, aramon an mga nagbubungkaras na athletic talent, aain pagyamanon an pakikipag amigo asin an ‘national pride’ sa hanay kam mga student-athletes na may manlaen-laeng background.
