Bukas si Presidente Ferdinand Marcos Jr. sa rekomendasyon kan Department of Finance (DOF) na patawan nin buwis an mga online gaming operators tangani maresolbar an mga isyung kaakibat kan online gambling.
Sigun ki Palace Press Officer Claire Castro, aram kan Presidente an peligro sa mga indibidwal na lulong sa sugal kaya man dae kaini tututulan an propwesto basta igwa nin bastante na pag-aadal dapit sa klase asin man saklaw kan buwis na ipapataw.
Apwera digde, mas pahihiguton man kan gobyerno an kampanya laban sa mga dae rehistradong online gaming platforms. Mientrastanto, bukas man an Palasyo na pag-adalan an propwestong total ban sa online games.
An gabos kan suhestiyon tangani limitaran an epekto kan online gambling, orog na sa mga nalululong digde an susuportaran ini kan Presidente.
