Nanawagan si Pangulong Ferdinand Marcos Jr. sa United Nations General Assembly para suportahan ang kandidatura ng Pilipinas sa non-permanent seat ng UN Security Council, kasabay ng kanyang panawagan para sa pandaigdigang kapayapaan, proteksyon sa karapatang pantao, at aksyon laban sa climate change.
Sa kanyang talumpati, iginiit ni Marcos Jr. na ang seat sa Security Council ay isang pribilehiyo na dapat mapanalunan sa pamamagitan ng dedikadong serbisyo at pakikipagtulungan sa UN.
Binigyang-diin niya ang kahandaan ng Pilipinas na magsilbing boses ng balanse at prinsipadong kapayapaan, habang nakikipagkumpitensya sa Kyrgyzstan para sa Asia-Pacific regional spot sa halalan sa Hunyo 3, 2026.
Kasabay nito, nanawagan ang Pangulo ng agarang aksyon para sa kapayapaan sa Middle East, Ukraine, Sudan, DRC, Sahel, Yemen, at Myanmar, at tiniyak ang hindi mapipigilang daloy ng humanitarian aid sa mga apektadong tao.
Tinalakay din niya ang epekto ng climate change sa bansa, na tinukoy bilang “present reality” sa Pilipinas, at ang pagsisikap ng gobyerno na ilaan ang 18 porsiyento ng pambansang badyet para sa climate-related expenditures noong 2025.
Dagdag pa rito, tiniyak ni Marcos ang patuloy na suporta ng Pilipinas sa rule of law, karapatang pantao, multilateralism, at pagsunod sa UN Charter at UNCLOS bilang responsableng kasapi ng pandaigdigang komunidad.
