NAGTUTUBOD si Presidente Ferdinand Marcos Jr. na kaipuhan na mas pakusugon pa kan nasyon na myembro kan ASEAN an saindang supply chains asin pakusugon an kalakalan sa laog mismo kan rehiyon.
Sigon sa Presidente, saro sa importanteng adal gikan sa COVID- 19 pandemic ay an pangangaipong gibuhon na mas matibay an supply chains, lalo na sa paagi kan ibang mga nasyon na myembro kan ASEAN.
Naunambitan man kan Punong ehekutibo na pinagkakarkulong nasa 23 na porsyento lang kan kabilugang kalakalan sa ASEAN an hale sa intra-trade o kalakalan sa laog kan rehiyon mantang 77 na porsyento an hale sa luwas kan ASEAN.
Huli digdi, nakaigwa nin kasunduaan an mga myembro kan nasyon na enoton na pakusugon an koneksyon sa pangkalakalan sa laog kan ASEAN Region.
Naunambitan man kan Presidente na kaibanan sa mga lakdang na pinag-oorolayan an pagbilog kan Common ASEAN Power Grid asin pag-standardize kan mga proseso sa importasyon para mas maparikas an transaksyon asin mas mapararom an pag-intindi sa batas asin sistema kan lambang nasyon.
Obheto man kaini na maibalik an ASEAN bilang sarong makusog na puwersa sa pandaigdigang ekonomiya.
