Nagin panauhing pandangal si Presidente Ferdinand Marcos Jr., sa ika-78 anibersaryo kan Philippine Air Force (PAF) kan subagong pagkaaga.
Nag-atendir man sa event sinda Defense Secretary Gilberto Teodoro, Philippine Air Force Commanding General Lieutenant General Arthur M. Cordura, Armed Forces of the Philippines General Romeo S. Brawner Jr., asin an iba pang major service commanders kan AFP.
Mayor na misyon kan PAF iyo an siguraduhong salbado an himpapawid asin teritoryo kan Pilipinas sa ano man na mga ‘aerial foreign intrusion.’
Sa aspeto kan Territorial Defense and Air Surveillance, nakapagsagibo na an PAF nin 1,034 flying hours para sa air asin man maritime patrols sa West Philippine Sea, Philippine Rise, asin iba pang importanteng choke points.
Nakapagsagibo man ini nin 95 maritime patrol flights gamit an air defense surveillance radars sa Philippine Air Defense Identification Zone (PADIZ).
Kasabay kaini, padagos na ipinapautob an Comprehensive Archipelagic Air Defense Concept (CADC) para sa mas pinagsalak na operasyon kan air, maritime, asin man land assets.
Saro man sa accomplishment kan PAF ngunyan na taon iyo an pagsimbag sa mga kalamidad siring na sana kan Bagyong Carina, Kristine, Pepito, asin sa mga forest fire sa Ilocos Norte. Nag-deploy man an PAF nin Urban Search and Rescue team sa Myanmar makalihis an linog.
