Pighurot ni Presidente Ferdinand Marcos Jr. na prerogative kan Senado asin Kamara an magsagibo nin imbestigasyon sa maanomalyang flood control projects.
Ini an dawa pa igwa nin mga alegasyon na nagkapirang lehislador an dawit sa nasambitan ng kontrobersya.
Sigun sa Presidente, mayong ano man na kapangyarihan an ehekutibo na piriton an siisay man na lehislador na mag-inhibit, orog na ta haros imposibleng may umamin na may direktang koneksyon sa mga kontrata.
Dugang pa kaini, makakatabang an imbestigasyon kan lehislatura tangani magtao nin dagdag na impormasyon na magagamit kan bibilugon na independent commission sa irarom kan executive order.
Pigsierto man kan Malacañang na ibubulos an bilog na suporta sa commission asin man makikipagtabangan an gabos nin ahensya kan gobyerno tangani dagusang mabuyagyag an katotohanan sa likod kan mga iregularidad.
