Pigtintaan na ni Presidente Ferdinand Marcos Jr. an mga ley na nagde-deklarar nin holiday sa manlen-laen na lugar sa nasyon.
Pinirmahan kan Presidente an Republic Act No. 12103 na nagde-deklarar sa April 16 kan kada taon komo special non-working holiday sa Marikina city, para sa saindang founding anniversary na aapudon na ‘Marikina City Day’.
Nakabugtak sa ley na enkaso magtapat an holiday sa school day, sususpendiron an klase sa gabos na antas sa Marikina.
Sa irarom man kan RA no. 12098, deklaradong special nonworking holiday an April 2 kan kada taon sa Antipolo City sa Rizal para sa saindang Cityhood anniversary.
Special nonworking holiday na man an Nov. 23 kan kada taon sa bilog na lalawigan kan Benguet para sa saindang foundation day o ‘Benguet Day’. January 22 sa Guiguinto Bulacan para sa Halamanan festival, Nov. 7 sa Cuenca, Batangas para sa “Cuenca Foundation Day”, June 20 sa Guinayangan Quezon para sa founding anniversary; November 3 sa Kalibo Aklan para sa “Kalibo foundation day”; January 8 sa Pavia, Iloilo para sa “Pavia Day”, at July 28 sa Cabadbaran City, Agusan del Norte para sa “Cabadbaran Day”.
