NAGA CITY– Kasabay kan imbestigasyon kan pulisya, padagos man an pagsisid kan Philippine Coast Guard (PCG)- Bicol sa kadagatan na sakop kan Barangay Basud, Masbate City katakod kan nagyaring pagsabog sa lugar.
Sa entevista kan Bombo Radyo Naga ki Lt. Marlowe Acevedo, tagapagtaram kan PCG-Bicol, sinaysay kaini na posible suboot may madukayan pang mga ebidensya sa irarom kan kadagatan na pwedeng makatabang sa imbestigasyon kaya padagos an ginigibo nindang operasyon.
Alagad sigun ki Acevedo, sa ngunyan nakakaapektar sa saindang operasyon an makusog na hukol kan kadagatan.
Mientrastanto apwera sa pagsisid sa lugar, nagsasagibo naman sinda nin foot patrol sa mga pampang na sakop kan Barangay Basud magin sa mga kataraid na Barangay kaini.
Nagdagdag na man sinda nin mga tauhan tanganing mapadanay an seguridad kan mga residente sa lugar.
Sa suhay na pakikipag-olay kan Bombo Radyo Naga ki PSupt Paul Cabog, hepe kan Masbate City PNP, sinaysay kaini na dae ninda pighahale an posibilidad na may koneksyon sa terorismo an nangyaring pagpasabog sa nasabing lugar.
