Pigsierto ni Presidential Communications Office (PCO) Secretary Dave Gomez na determinado si Presidente Ferdinand R. Marcos Jr. na panimbagon an mga tiwaling opisyal asin wakasan an kultura kan korapsyon sa gobierno.
Sigun ki Gomez na naglalapigot an administrasyon tanganing maibwelta an tiwala kan publiko asin mga mamumuhunan sa paagi kan transparency asin mga reporma.
Dugang pa ni Golez sisiertuhon kan Presidente Marcos na maninimbag an siisay man na imbwelto sa iregularidad asin salang paggamit kan pondo nin bayan.
Pigpunto man ni Gomez an pagkakamukna kan Independent Commission for Infrastructure (ICI) na obhetong magkundusir nin imbestigasyon asin magrekomendar kan kaso kontra sa mga responsable.
Bilog pa man an pagtubod ni Gomez na makakatabang an pusog na panininundugan kan gobierno kontra sa katiwalian asin an pagbabagong institusyonal tanganing mamantinir an tiwala kan mga mamumuhunan asin katatagan kan ekonomiya.
