NAGA CITY- Nagpapadagos an pigsasagibong operasyon kan PDEA-Camsur kontra sa ilegal na droga na nagtitinir na problema kan komunidad.
Sa entrevista kan Bombo Radyo Naga ki IAV Mark Anthony Viray, Provicial Officer kan PDEA-CamSur, sinaysay kaini na kan nakalihis na Octobre 10, 2024 nakapag-dismantle an saindang grupo nin drug den sa may parte kan San Roque Calabanga, Camarines Sur kun saen naaarestrar digde an tolong drug personality asin nakumpiskar an nagpapakol sa poco mas o menos 50 grams kan ilegal na droga.
Sigun ki Viray, an nasambitan ng operasyon an nagpapahiling na yaon an saindang commitment sa padagos na pagkundusir nin mga buy bust operation tanganing dagusang mabuwag an mga pigkokonsederar na drug den orog na sa probinsiya kan Camarines Sur asin maideklarar na drug free an sarong banwaan o barangay.
Katakod digde, importante soboot na nadadakop kan mga otoridad an mga tawo na padagos na nagbabalgar sa ley asin naggigibo nin iligal na aktibidad nin huli ta sa paagi kaini mararaot an saindang operasyon asin mauuntok an suplay kan drugs.
Dugang pa kan opisyal, dae nagpapabaya an mga kapulisan sa pagsusog sa mga tawo na imbwelto sa illegal activities tanganing dagusan ng masawata an mga ini asin maabot an saindang obheto na linigan an komunidad kontra sa iligal na droga.
Sa ngunyan, pigsierto na sana ni Viray na yaon pirme an presensiya kan mga otoridad tanganing proteheran an publiko kontra sa iligal na aktibidad.
