NAGA CITY- Dae suboot matugot si Philippine Drug Enforcement Agency (PDEA) Dir. Gen. Aaron Aquino na maatian an magayon na pangaran asin reputasyon kan saindang ahensya makalihis i-relieve sa pwesto an regional director kan PDEA-4A asin an labi sa 60 na mga kabuhan kaini huli sa iregularidad suboot sa nagkapirang mga operasyon sa parte kan Batangas asin Cavite.
Ini an tinawan doon ni Dir. Derrick Arnold Carreon, Public Information Office (PIO) chief kan PDEA sa ekslusibong entrevista kan Bombo Radyo Naga.
Sigon ki Carreon, nagpapadagos an saindang mas pinahigot na internal cleansing, counter intelligence, monitoring asin lifestyle check para masierto na dae magkakaigwa nin anomalya o iregularidad an mga operasyon kan ahensya.
Katakod kaini, nangapodan si Carreon sa publiko na tulos na ipaabot sa saindang opisina kun igwa nin mga indibidwal na nagpapamalo-malong PDEA personnel para sana magkondusir nin mga iligal na aktibidad.
Sa huri, tinawan doon ni Carreon na nakatutok an saindang ahensya sa padagos na paglapag sa mga High Value Targets (HVTs) asin sa pagkokondusir nin mga high impact operations katakod sa kampanya kontra iligal na droga kan Duterte Administration.
Marurumduman na na-relieve sa pwesto si dating PDEA-4A Dir. Archie Grande asin naibalyo sa Region 9 mantang nagribay man sa saiyang pwesto si Dir. Adrian Albariño.
