NAGA CITY- Labi ngonyan an panghihinayang kan Provincial Drug Enforcement Unit (PDEU) Camarines Sur katakod kan desisyon ni Presidente Rodrigo Duterte na haleon na sa kamot kan Philippine National Police (PNP) asin sa iba pang law enforcement agencies an gabos na anti-illegal drug related operations.
Sa entrevista kan Bombo Radyo Naga ki P/Supt Ruben Padua, chief kan PDEU-CamSur, sinaysay kaini na dawa nanghihinayang, nirerespeto pa nanggad ninda an kasuguan kan presidente.
Kun marurumduman, enot ng sinaysay ni PNP chief Director General Ronald dela Rosa na nagbaba na nin memorandum sa PNP kun saen nakabugtak digdi na magiging limitado naman an papel kan PNP-Drug Enforcement Group (DEG) sa mga anti-illegal drug operations kaibanan na an pagpapauntok sa Oplan Tokhang asin Oplan Double Barrel Reloaded.
Sigon ki Padua, dakula suboot an posiblidad na igwang koneksyon an nasambitang desisyon kan presidente sa mga isyung kinakaatubang ngonyan kan linyada kan kapulisan.
