NAGA CITY- Nakatalaan na i-selebrar sa siyudad nin Naga partikular sa Naga City People’s Mall an Peñafrancia De Mayo kasabay kan ika-14 taon na Anibersaryo kaini.
Sa nagin paghampang sa mga kagawad kan media ni Fr. John Robert Banyag, Parish Priest, sinaysay kaini na an nasambitan ng selebrasyon an bako sana para sa Naga Cathedral kundi kaiba man digde an Basilica Minore, NCPM asin iba pang relihiyosong organisasyon.
Ini an pigseselebrar taon-taon orog na kan mga deboto ni Ina Peñafrancia. Sigun ki Fr. Banyag, mapuon an selebrasyon Mayo 16 asin madurar hasta 24 kun saen sa enot na aldaw, magkakaigwa nin Thanks giving mass sa Activity center o sa mismong Chapel pasado alas 8 nin aga.
Obheto kaini na makapagpasalamat an gabos na mga deboto sa biyaya na saindang nareseber sa ara-aldaw.
An aktibidad na ini an siyam na aldaw na pagpamibi asin debosyon kun saen igwang mga establishment an susungkuan o dadagusan kan Imahe ni Ina. Maabot man an nasambitan ng Imahe sa Mayo 16 na sasabayan nin dagos-dagos na Santa Misa.
Sa pangkabilugan, huli ta nagin busy an mga tawo sa Naga City People’s Mall kan nakalihis na Setyembre sa mismong kafiestahan kun kaya nagseserbeng opurtinidad ini sa gabos na yaon sa merkado publiko tanganing maiselebrar an Peñafrancia Fiesta.
