NAGA CITY- Pigsaysay kan Schools Division Superintendent kan DepEd Iriga na an performance kan mga estudyante sa National asin International test magin an conjested curriculum an duwang primerong basehan sa pag-implementar kan Matatag Curriculum.
Sa entrevista kan Bombo Radyo Naga ki Dr. Mariano De Guzman an Schools Division Superintendent kan DepEd Iriga, sinaysay kaini na sa pigkundusir na mga test kan mga estudyante sa laog o luwas kan nasyon nagluluwas na dae nakakua nin nasa 75% na resulta an mga ini.
Siringman, an pig-aapod na conjested curriculum huli sa dakol na kaipuhan pag-adalan kan mga aki, dae na makapag-focus an mga ini orog na sa basic.
Kun kaya pig-implementar an Matatag Curriculum na kun saen binawasan an mga subject na dawat tawan focus asin mas orog na pinapusog an reading and numeracy.
Marurumduman, 45 minutes na sana kada subject an pinagtagama sa mga paratukdo tanganing malikayan an boredom, makapag-focus an mga estudyante asin magkaigwa nin retention.
Dugang pa kan opisyal sa paagi kan Matatag Curriculum mas pinapagayon an methodology asin enhancement sa mga maluluyang area kan mga estudyante.
Sa ngunyan, mawot na sana kaini na mas orog pang tawan nin oras kan mga estudyante an saindang pag-aadal tanganing magin marhay an saindang futuro.
