Liwat na pinagtibay ninda Presidente Ferdinand Marcos Jr asin South Korean President Lee Jae Myung an strategic partnership kan duwang nasyon makalihis na nagkaulay an duwang lider sa paagi kan telepono kan nakalihis na banggi.
Pigtawan-duon man ni Presidente Marcos an importansiya kan suporta gikan sa mga partner countries sa pagmamantinir kan maritime interest kan Pilipinas asin mamantinir an stability sa rehiyon.
Inihayag ni Presidente Marcos na nagin produktibo an saindang pag-uulay sa telepono.
Sigun sa Presidente, napag-ulayan ninda kan Korean President an pagpapahewas pa kan koneksiyon kan duwang nasyon, partikularmente sa trade and investment.
Siring man para sa kooperasyon sa pagbubusol pa kan mga development initiatives na kapwa mabenipisyo an mamamayan kan Pilipinas asin South Korea.
Napag-ulayan man an kooperasyon sa linya kan imprastraktura asin people to people exchanges, kun saen pigtawan-duon soboot na an Strategic Partnership kan duwang nasyon, an sarong oportunidad para sa pagpapaheas asin pagpapararom pa kan relasyon kaini.
Binati ni Presidente Marcos si Lee na nag-assume sa pwesto kan nakalihis na June 4 asin pigsierto an saiyang suporta sa South Korean leader.
Pinasalamatan ni Presidente Marcos an South Korea sa saindang tabang asin suporta sa nasyon.
Nagpahayag man nin kaogmahan si Presidente Marcos na mahiling si Lee sa gaganpon na 2025 Asia-Pacific Economic Cooperation Summit, kun saen an South Korea an ma-host ngunyan na taon.
Sa kampo man ni Lee, pigsierto kaini na an saiyang suporta para sa sarong makusog na Association of Southeast Asian Nations (ASEAN)–South Korea engagements.
Sa ngunyan puspusan na an pagpreparar kan Pilipinas sa pag-assume kaini sa ASEAN chairmanship sa 2026.
