Burado na an Pilipinas gikan sa listahan kan “high-risk” money laundering kan European Union (EU). Ini an kasunod man kan paghali sa Pilipinas gikan sa grey list kan money laundering watchdog na Financial Action Task Force (FATF) kan Pebrero.
Ikinaogma man kan European Chamber of Commerce of the Philippines an pagtanggal sa nasyon gikan sa listahan kan mahigot na binabantayan sa money laundering asin terrorism financing na bunga soboot kan pagpapakusog pa kan laban kan gobyerno kontra sa nasambitan ng mga iligal na gibuhon.
Nahihiling man ini kan grupo na magpapahusay pa sa kumpiyansa kan mga investor asin maparekas kan mga financial transactions sa European counterparts asin ipamalas an reputasyon kan Pilipinas komo sarong credible asin attractive destination para sa trade asin investment.
Apwera pa sa Pilipinas, hinali na man sa listahan an Barbados, Gibraltar, Jamaica, Panama, Senegal asin Uganda mantang naidugang man sa mga nasyong masusing binabantayan sa money laundering an Algeria, Angola, Ivory Coast, Kenya, Laos, Lebanon, Namibia, Nepal, Venezuela, kaiba na an Monaco.
Nakatalaan man na magsairarom sa pagsusuri kan European Parliament asin member states an binagong listahan kan EU saka ini ipapautob sa laog kan sarong bulan kun mayong pagtutol.
