Sarong bulan antes magpuon an ikaduwang termino ni Donald Trump komo Presidente kan Estados Unidos, pigpepreparar na kan mga konsulado kan Pilipinas sa Amerika an saindang mga serbisyo tanganing tabangan an mga undocumented na Pilipino na mawot magbwelta sa Pilipinas.
Kasunod an kan piglalaomang mahewasang deportasyon asin mahigot na mga polisiya sa immigration sa irarom kan bagong administrasyon.
Pigheras ni Consul General Senen Mangalile kan Philippine Consulate sa New York na preparado ining magtabang sa mga Pilipinong pwedeng maapektaran kan mga bagong polisiya.
Naglaan nin pondo an Department of Foreign Affairs (DFA) sa paagi kan Assistance to Nationals (ATN) program tanganing matabangan an mga undocumented na Pilipino sa gastos para sa saindang ticket pabweltada sa Pilipinas.
Ipinaliwanag ni Mangalile na an mga undocumented na Pilipino sa Estados Unidos na nangangaipuhan nin tabang para sa repatriation an pwedeng magin kwalipikado na makua an pondo gikan sa ATN.
An mga interesadong mag-avail kan tabang an pwedeng magbisita sa sa Assistance to Nationals Section kan konsulado, na bukas puon lunes hasta biyernes, 9:00 AM hasta 5:00 PM, o pwede ining makipag-koordinar sa email sa newyorkpcg.atn@dfa.gov.ph.
Para sa mga tulos na pangangaipuhan, igwang moble hotline man na (917) 294-0196.
Pigsierto ni Mangalile sa mga Pilipino na preparado an saindang mga kawani na konsulado na tabangan an mga ini sa pagproseso kan mga kinakaipuhan na dokumento para sa saindang pagbwelta sa Pilipinas.
Dugang pa kaini, pigtawan-duon na dae kaipuhan matakot an mga undocumented na Pilipino na magrani sa konsulado para maghagad nin tabang, asin mayong makukulon sa paghahanap nin tabang.
