Ipinahayag kan Capital Economics na pwedeng dae maabot kan Philippine economy an Gross Domestic Product (GDP) targets kaini hasta 2027 huli sa padagos na isyu sa anomalya sa flood control projects.
Piglalaomang maabot sana sa 4% an pag-uswag kan GDP ngunyan na 2025, mas hababa sa target kan gobyerno na 5.5-6.5%.
Padikit-dikit ining malangkaw da 4.5% sa 2026 asin 5% sa 2027, alagad nagtitinir na mas hababa sa target kan gobyerno na 5.5-6.5%.
Binanggit man ni Gareth Leather kan Capital Economics na an corruption scandal an padagos na mapagabat sa nasyon sa mga masunod na quarters asin posibleng mag trigger pa kan dugang na rate cuts gikan sa Bangko Sentral ng Pilipinas (BSP).
Kasabay kaini, pigreport kan ANZ Research na an ekonomiya kan Pilipinas an piglalaomang ma-uswag nin 4.8% ngunyan na taon huli sa pagtitipid kan gobyerno asin masusing pag-iimbestigar sa mga public infrastructure projects.
Napag-araman na sa ika-tolong quarter, nagluya man an pag-uswag kan ekonomiya sa 4%, pinakamaluya puon kan COVID-19. Nagbaba man an government spending sa P430.6 billion kan nakalihis na Oktubre, pagbaba nin 7.76% puon kan nakalihis na taon.
Sa ibong kaini, hababa an inflation projections na piglalaomang nag-abot sa 1.6% ngunyan na taon asin malangkaw sa 2.4% sa 2026, sigun sa Capital Economics.
Ini man an nagbukas nin posibilidad kan dugang na monetary easing, mantang nagpapadagos an BSP sa pagbaba kan key policy rate sa 4.5%.
