Pighahalat pa kan Embahad kan Pilipinas sa United Arab Emirates an instruksiyon gikan sa Pilipinas kun pwedeng gamiton an arrest order kontra ki dating Presidential Spokesperson Harry Roque tanganing makakalap pa nin dugang na impormasyon sa pagtitinir kaini sa UAE kaiba an saiyang agom na si Mylah Roque.
Pinaliwanag ni Philippine Ambassador to the UAE Alfonso Ferdinand Ver na dae basta magtao nin impormasyon an mga otoridad duman kun mayong arrest order o interpol notice huli ta igwa man soboot privacy an sarong indibidwal na yaon sa UAE, legal man ini o ilegal na yaon sa nasambitan ng nasyon.
Alagad basado soboot sa saindang huring impormasyon na naresiber, presenteng yaon sa UAE pa man si Roque asin saiyang agom.
Marurumduman na naenot nang naireport kan Bureau of Immigration na pwedeng nakahali nin Pilipinas si Roque sa ilegal na paagi huli ta mayo ining records sa immigration na naghali sa nasyon.
Sigun ki Immigration Chief Comm. Joel Viado, pinag-aadalan na kan saindang legal team an pagsusunad nin dugang na mga kaso kontra ki Roque huli sa ilegal na pagbiyahe kaini.
Enot digde, nadawit an pangaran ni Atty. Roque sa kasong qualified human trafficking na pigsunad man kontra kina Cassandra Ki Ong asin iba pa manungod sa soboot ilegal na aktibidad kan POGO hub na Lucky South 99 Corp. sa Porac, Pampanga.
Presenteng igwang outstanding arrest order si Roque gikan sa House of Representatives makalihis na ma-cite in contempt huli sa kabiguan kaining magsumiter kan mga pighahagad na dokumento na magtaong rason sa soboot biglaan na paglobo kan saiyang yaman.
