Nagkasundo an Pilipinas asin France na papakusugon an saindang kooperasyon sa sektor kan dairy project, sigun sa Department of Agriculture (DA).
An memorandum of understanding (MOU) an pigpirmahan kan nakalihis na Enero 22 ninda Agriculture Secretary Francisco Tiu Laurel Jr., na kumakatawan sa National Authority (NDA), asin Phylum SARL Managing Partner Francois Gary.
An Phylum SARL an sarong kumpanya gikan sa France na eksperto sa mga pagkakan, kalusugan kan hayop, asin kapakanan kan mga hayop.
Sigun sa kasunduan mataong-giya ini sa pag-aadal kan feasibility study para sa Philippine Dairy Project na obhetong mapamarhay an industriya kan gatas sa nasyon.
An nasambitan ng feasibility study an po-pondohan man nin grant gikan sa French government’s Fonds d’Etudes et d’Aide au Secteur Prive asin maadal kun kwalipikado an proyekto para sa sarong concessional loan gikan sa gobyerno kan France.
Obheto man kan proyekto na magpatindog nin sarong modernong dairy farm sa Ubay, Bohol, na igwang kapasidad na mag-ataman nin labi sa 300 na baka para sa produksiyon kan gatas.
An pasilidad an magkakaigwa nin kakayahang magproseso nin hasta 10 metrikong toneladang hilaw na gatas kada aldaw.
Apwera digde matindog man nin mga milk collection center asin mga milk processing facility sa mga piling lugar sa bilog na nasyon.
Sa presente, an sufficiency rate kan gatas sa Pilipinas an nasa 1.66% sana, asin obheto kan DA na maabot an 5% o 80 milyong litro kan gatas sa taong 2028.
Siring man, mababa pa man an produksiyon kan gatas sa kaa baka, na nasa 8 litro sana kada aldaw, kawsa kan mga dae magagayon na feed asin pamamayo, halangkaw na kantidad kan produksiyon, asin kakulangan sa imprastruktura kan dairy.
Mientrastanto, naglalaom man an NDA na magbubukas an proyekto kan mga pagkakataon para sa mga international cooperation asin pamumuhunan gikan sa pribadong sektor tanganing mapamarhay an lokan na industriya nin gatas sa Pilipinas.
