Pigsasapinal na kan gobyerno an nagkapirang mga mosyon tanganing dagusan maisairarom sa freeze order an iba pang ari-arian ni Zaldy Co, an dating Appropriations Committee chairman na dawit sa soboot korapsiyong nangyari sa mga public infrastructure project.
Sigun ki Department of the Interior and Local Government (DILG) Sec. Jonvic Remulla, ini an mantang padagos na pighahanap an dating lehislador tanganing dagusang maarestar asin maibweltada sa nasyon.
Kaibahan sa mga target na maisyuhan kan freeze order iyo an duwang harong ni Co sa Forbes Park sa Makati City.Kaibahan man digde an Misibis Bay Resort, Midas Hotel, asin Casino na pawang konektado sa saiyang kumpaniyang Eco Leisure.
Nagtitinir na kampante an DILG chief na dagusan man maarestar an dating lehislador, orog na ta dakulang tabang soboot an pag-freeze sa saiyang mga asset sa irarom kan Civil Asset Forfeiture.
Enot nang nagsunad an Anti-Money Laundering Council (AMLC) nin freeze order kontra sa iba pang darakulang ari-arian ni Co.
Kaibahan digde an kadakol na air assets, labi 3,500 bank accounts, ginatos na lunadan, insurance policies, asin iba pang ari-arian na igwang kabilogang kantidad na P12 billion.
