Liwat napabali an Pilipinas sa listahan kan 10 ”worst countries” para sa mga obrero basado sa 2024 Global Rights Index kan International Trade Union Confederation (ITUC) na iniluwas kan Biyernes, Hunyo 6, 2025.
Ika-siyam na sunod na taon nang kabali an Pilipinas sa listahang ini, sigun sa Workers Rights Watch siring kan Kilusang Mayo Uno, Unyon ng mga Manggagawa sa Agrikultura, National Federation of Sugar Workers, Alliance of Concerned Teachers, Kilusan ng Manggagawang Kababaihan, Confederation for Unity, Recognition and Advancement of Government Employees, Public Services Labor Independent Confederation, Bukluran ng Manggagawang Pilipino (BMP), Migrante Philippines, asin Center for Trade Union and Human Rights.
Apwera sa Pilipinas, kaiba man sa 10 ”worst countries” para sa mga obrero an Bangladesh, Belarus, Ecuador, Egypt, Eswatini, Myanmar, Nigeria, Tunisia, asin Turkey.
Basado sa report, pinakamadalas pigbabalgar sa Pilipinas an derichos na magwelga (87%), nagsunod an derichos sa collective bargaining (80%), derichos magtatag o magbali sa union (75%), asin derichos sa hustisya (72%).
Mientrastanto, sigun ki Labor Secretary Bienvenido Laguesma na dae isinasaalang-alang kan report an mga lakdang kan presenteng administrasyon tanganing maresolbar an mga haloy nang isyu.
Duon kaini, kun tunay na saro an Pilipinas sa pinakamaraot na nasyon para sa mga obrero, dae kuta ini pig-lihir komo miyembro kan ILO Committee on Freedom of Association kan nakalihis na taon.
