Nagpantolo an Pilipinas sa mga nasyon sa bilog na Asya na nakakaeksperyensiya nin pinaka-bakong pangkaraniwang init kan panahon na igwa nin kinaaraman sa climate change sa nakalihis na 3 bulan o puon Disyembre hasta Pebrero.
Basedo sa report gikan sa Climate Central, napag-araman na nakaeksperyensiya an nasyon nin temperaturang nasa Climate Shift Index (CSI) level 2 o mas halangkaw pa sa laog nin 74 na aldaw na posibleng kawsa kan pagbabago kan panahon.
An CSI sarong sistema na nagsusukol sa epekto kan climate change sa temperatura sa sarong nasyon urualdaw.
Kun mas halangkaw an lebel, boot sabihon kaini na mas halangkaw an epekto kan climate change.
Pangenot man na epekto kan climate change an kawsa kan tao gikan sa burning coal, oil asin methane gas na gikan sa mga rehiyon sa bilog na kinaban.
Basado man sa report, labi 45 million katawo sa bilog na kontinente an nalantad sa 30 aldaw na delikadong init kan panahon kawsa kan climate change.
Sa Pilipinas, haros 200,000 Pilipino an na-expose gikan sa 116 milyong kabilogang populasyon.
Nangengenot man sa mga nasyon na nakakaeksperyensiya nin most unusual heat an Brunei Darussalam sa laog nin 83 aldaw asin panduwa an Maldives sa laog nin 81 aldaw.
