Pormal nang tinintaan kan Pilipinas an United Nations Convention against Cybercrime, sarong pankinaban na kasunduan na tuyong pakusugon an kooperasyon kan mga nasyon sa paglaban sa mga krimen sa digital na kinaban asin pagpaparikas kan cross-border sharing kan electronic evidence.
Ini man sarong makasaysayan na kasunduan huli ta pigbibisto kaini sa enot na pagkakataon an non-consensual distribution kan intimate images komo sarong klase nin cybercrime.
Nag atendir sa pagtinta si Department of Information and Communications Technology (DICT) Secretary Henry Aguda, na representantes kan Pilipinas sa convention na ginibo kan Oktubre 25-26 sa Ha Noi, Vietnam.
Sigun sa DICT, ipinanukala kan Pilipinas an mas makusog na proteksyon para sa mga kaakian na naggagamit nin internet, pati na man an dugang na technical assistance para sa mga developing countries.
Katuyuhan kaini na mabalanse an epektibong pagpapautob kan ley asin an paggalang sa karapatan nin tawo sa digital na espasyo.
Pigtawan duon sa convention an manlaen-laen na aspeto kan cyber offenses, pagheheras kan electronic evidence, asin an pagtatag kan 24/7 international cooperation mechanism tanganing maparikas an pagsimbag sa mga insidente kan cybercrime.
Sa mensahe ni Presidente Ferdinand Marcos Jr., pigtawan duon kaini an determinasyon kan Pilipinas na pakusugon an global cooperation kontra sa cyber threats, mantang pinapangatamanan an trust, accountability, asin human rights sa panahon kan digital transformation.
Kasabay kaini, ipinaalerto man kan DICT na padagos nindang pinapatibay an cyber resilience kan nasyon sa paagi kan mga programa siring kan Oplan Cyberdome asin Oplan Paskong Sigurado, na nakatuon sa proactive cyber defense asin pagpapalangkaw kan kamalayan kontra sa online scams asin cybercrimes
