NAGA CITY- Kinundenar kan manhamiento kan 9th Infantry Division, Philippine Army (PA) an pananambang kan mga rebeldeng New People’s Army sa mga soldados sa banwaan nin Ragay, Camarines Sur na nagresulta sa pagkagadan nin sarong cafgu mantang nairido man an apat na iba pa kabale na an duwang sibilyan.
Sa entrevista kan Bombo Radyo Naga ki Capt. Joash Pramis, Chief kan Division of Public Affairs Office (DPAO), an nasambitang pananambang kan mga rebelde an solamenteng paagi na naisip kan mga ini tanganing tahuban an saindang salang gibo.
Sigon ki Pramis, an pagkakadamay kan duwang sibilyan sa nasambitang insidente an pagpapahiling sana na mayong pakiaram an mga rebelde sa seguridad kan mga sibilyan.
Mientrastanto, sa paagi man kan sarong surat na ipinadara kan nagpabistadong miyembro kan Norben Gruta Command-NPA-West Camarines Sur sa Bombo Radyo Naga, pigtuga kan mga ini na sinda an yaon sa likod kan nasambitang pananambang.
Naghagad man nin dispensa an nasambitang grupo sa mag-agom na sibilyan na nadamay sa insidente kun saen tulos man suboot sindang mapaabot nin tabang sa nasambitang mga biktima.
Kun marurumduman, nangyari an pananambang sa Sitio Bato, Upper Sta Cruz mantang pasiring kuta na an tolong Cafgu sa kasentrohan kan nasambitang banwaan kan bigla ining pauranan nin bala kan mga rebeldeng grupo.
Napuruhan sa insidente si Norbert Zabariza mantang nairido man an duwang kaibanan kaini kabale an mag-agom na sibilyan na sinda Rey Patricio asin Versabi Barrientos.
