(UPDATE) NAGA- Mahigot na pigkondenar kan manhamiento kan 2nd Infantry Division, Philippine Army an pigkondusir na pananambang kan rebeldeng New People’s Army (NPA) sa mga kabuhan kan 85th Infantry Battalion na nangyari sa banwaan nin Lopez, Quezon.
Sa entrevista kan Bombo Radyo Naga ki Capt. Patrick Jay Retumban, chief kan Division of Public Affairs Office (DPAO) kan 2ID, sinaysay kaini na pagbalgar sa international humanitarian law an paggamit nin improvised explosive device (IED) kan mga NPA kan tambangan kan mga ini an sarong military truck sa barangay Silang, pasado alas-8:30 subanggi.
Huli sa pangyayari, nagresulta ini sa pagkagadan kan biktima na pigbistong si Cpl. Nilo Juan mantang nairido man an tulo pa kaining pag-iriba na tinamaan suboot nin shrapnel.
Mientrastanto, nagpaabot na man suboot nin pakikidumamay si 2ID Commander MGen Rhoderick Parayno sa nabayaan na pamilya kan nagadan na soldados.
Marurumduman na pibabagtas suboot kan military vehicle an bulod na lugar sa Barangay Silang kan bigla na sanang nagsabog an sarong IED na pigsundan pa kan haros 15 minuto na riribayan nin putok sa pag-ultanan kan mga soldados asin NPA.
Makalihis man an pananambang sa barangay Silang, nakabakbakan man kan reinforcement group kan militar an pigkakarkulong 20 mga rebelde na nangyari sa Barangay Cogorin sa parehong banwaan.
