NAGA CITY – Nagin matrayumpo an pigkundusir na signing kan accreditation contract para sa Z-Benefit package sa pag-ultanan kan Philhealth Bicol asin Bicol Medical Center kasuudma, Marso 28, 2025.
Sigun ki Alberto Manduriao, Regional Vice President kan Philhealth Regional Office V, sinaysay kaini na obheto kan nasambitan ng partnership an tanganing mas magdakol pa an mga pasyente na matatabangan orog na an mga nangangaipuhan para sa kidney transplants.
Ini sa paagi kan pagpapahewas kan local na access sa critical medical services tanganing maabot an mas inklusibo, accessible, asin patient-centered healthcare system.
Dugang pa kan opisyal, sa paagi pa kan partnership na ini masisierto na mayong mga Pilipino an ma- denied kan essential medical care huli sa financial limitations.
Marurumduman, an Z-Benefit Package for Kidney Transplantation an nagco-cover sa pre-transplant evaluations, surgical procedures, postoperative care, asin immunosuppressant medications.
An Package rates range nagpapakol puon P865,000 hasta P2,146,000, depende sa klase kan organ donor asin specific na procedure na ginibo.
Makakatabang ining marhay tanganing mabawasan an pinansyal na problema kan mga PhilHealth members.
Sa ngunyan, pigsierto na sana ni Manduriao na dagos-dagos an saindang mga programa tanganing orog pang makatabang sa mga namamanwaang Pilipino.
