Pigsierto kan Philippine Health Insurance (Philhealth) na bukas an access kan publiko sa dengue coverage kasunod kan padagos na paglangkaw kan mga kaso kan dengue gikan sa manlaen-laen na parte kan nasyon.
Sigun ki PhilHealth Senior Vice President for Health Finance Policy Sector Israel Francis Pargas, igwang tolong packages na pwedeng pagpilian an mga natamaan kan dengue.
Paliwanag ni Pargas, enot na digde an primary care benefit o an Konsulta na iyong service provider kan Philhealth kun saen pwede makapagpa-check up an mga nakakamate kan sintomas kan dengue nin libre asin mayong bayad.
Kaibahan na man sa package na ini an mga pwedeng ipaginong laboratory tests na makukua man nin libre sa saindang Konsulta provider.
Panduwang parte man kan mga packages an kun an pasyente an dinara sa emergency room huli sa mga sintomas kan dengue alagad dae man kinakaipuhan na ma-admit sa ospital, pwede man makaresebir nin compensation an mga pasyente sa irarom kan outpatient emergency care package.
An huring package man an para sa mga admitted patient na igwang diagnosis kan dengue na pwedeng makaresebir kan benipisyo na P19,500 na compensation asin kun malala man an dengue kan sarong pasyente makakaresebir man nin P47,000 an mga ini komo parte pa man kan packages na ini.
Mientrastanto, sigun man sa datos kan Department of Health (DOH), naoobserbaran soboot an bahagyang pagluya sa mga dengue cases sa nakalihis na apat na semana.
Puon kan magpuon man an taong-2025 hasta kaining Pebrero 15, naka kabilogang numero na 43,732 an mga kaso kan dengue sa bilog na nasyon na iyong 56% na mas halangkaw kumparar sa 27,995 na mga kaso kan nakalihis na 2024.
