Pinahewas kan Philippine Health Insurance Corporation (PhilHealth) an mga benespisyo kaini para sa mga pasyenteng may chronic kidney disease (CKD) asin iba pang seryosong kahelangan, kabali an hemodialysis, peritoneal dialysis, kidney transplant, asin emergency outpatient care.
Sigun ki Dr. Israel Francis Vargas, Senior Vice President kan Health Finance Policy Sector kan PhilHealth, naglangkaw na an kaso kan end-stage renal disease sa nasyon kaya kinakaipohan an mas mahewas na suporta.
Gikan kaya sa dating 90 sessions, piglangkaw na sa 156 an annual coverage para sa hemodialysis, katampad kan tolong session kada semana.
Piglangkaw man kantidad kan reimbursement kada session gikan sa dating P2,600 pasiring sa P6,350 na nagpakol sa haros P1 million an kabilogang benepisyo kan member kada taon.
Pinahewas man an benepisyo para sa peritoneal dialysis na P500,000 kada taon para sa adults asin P1.2 million para sa mga aki. Mientrastanto, pinahewas na man an Z-Benefit Package para sa kidney transplant.
Gikan sa dating P600,000, ngunyan an hasta P2.1 million an coverage para sa mga aki, asin labi P1 million para sa adults. Sakop na man ngunyan an transplant gikan sa deceased donors, apwera sa living donors.
Kaiba na man sa benepisyo an post-transplant care siring kan maintenance na bulong asin laboratory tests, na nagpapakol sa P600,000 hasta P660,000 para sa adults, asin hasta P1.7 million sa enot na taon para sa mga aki.
Apwera sa mga helang sa bato, piglunsar na man kan PhilHealth an bagong outpatient emergency care benefit.
Sakop na kaini an mga pasyenteng pigbubulong sa ER maski dae na-admit. May benepisyo na man para sa mga may heart attack na nagkakantidad nin P130,000 para sa bulong asin hasta P530,000 man para sa angioplasty.
Sigun pa ki Dr. Vargas, obheto kan PhilHealth na maibaba pa sa pitong aldaw an presenteng 23-day average kan pagbabayad nin claims, mas marekas sa itinalaang 60-aldaw na deadline.
