Nagpadara an Philippine Navy nin Naval Task Group 80.5 lunad kan BRP Antonio Luna (FF151) pasiring Malaysia para sa duwang darakulang naval exercises.
Pinangenotan ni Major General Edwin Amadar, Vice Commander asin Acting Flag Officer in Command kan Philippine Navy, an send-off ceremony kan nakalihis na Aug. 9 sa Naval Operating Base Subic.
Enot na mapartisipar an Philippine Navy contingent sa 3rd ASEAN Multilateral Naval Exercise (AMNEX) puon Aug. 15-22, 2025 sa Penang Island, Malaysia, kasabay kan ASEAN Fleet Review.
Obheto kan nasambitan ng lakdang an tanganing pakusugon an ibahan asin kooperasyon kan mga navy sa ASEAN sa paaagi kan harbor activities asin at-sea exercises tanganing simbagan an mga huma sa maritime security.
Kasunod kaini, masabak man an tropa sa 25th Maritime Training Activity MALPHI LAUT 2025, sarong bilateral exercise kaibahan an Royal Malaysian Navy puon Aug. 25-29, 2025.
Digde mas pigpapahigot pa an koordinasyon sa seguridad pandagat sa paaagi kan joint planning, navigation asin tactical engagements.
