NAGA CITY – Matrayumpong naiheras an humanitarian service kan Philippine Red Cross – Camarines Sur Chapter sa nakalihis na midterm election sa nagpakiparang Local Government Units.
Sa entrevista kan Bombo Radyo Naga ki Maria Felisa Badiola, chapter administrator kan Philippine Red Cross – Camarines Sur Chapter, sinaysay kaini na antes paman isagibo an kakatapos pa sanang, eleksyon, nagkaigwa sinda nin preparasyon, asin sa aldaw man kan eleksyon kan Mayo 12, igwa sindang naserbihan nin 8 LGUs kan 170 na first aiders sa 17 precint station.
Sa nasambitan ng LGUs, kabali digdi an siyudad nin Naga, Iriga, Baao, Nabua, Bato, Camaligan, asin Calabanga.
An mga nasambitan ng lugar an pigpili man katuwang an COMELEC.
Mientrastanto, mayo man nin nairehistro na malalang insidente o kariribokan sa 8 LGU na saindang naserbihan.
Katakod kaini, labi man an pasasalamat ni Badiola sa gabos na saindang nagin katuwang orog na an saindang mga volunteers tanganing magin matrayumpo asin matuninong an kakatapos pa sanang 2025 Midterm Election.
