Nagpagiromdom liwat an Philippine Institute of Volcanology and Seismology (PHIVOLCS) kasuodma, Abril 29 sa publiko na dae maglaog sa mga permanent danger zone (PDZ) an mga aktibong bulkan, maski pa garo nagkalma na an pira sa mga ini.
Sigun ki Phivolcs Director Teresito Bacolcol, nagtitinir na posible an biglaan na pagputok kan mga bulkan siring kan Bulusan sa Sorsogon asin Kanlaon sa Negros.
Marurumdumang naikurit an 24 minutong pagputok kan Bulusan kan nakalihis na Lunes na pigsunudan kan ash fall, rason tanganing ilangkaw an alert status kaini sa Level 1.
Sa ibong kan garo pagkalma, 89 volcanic quakes pa man an naikurit sa nakalihis na 24 oras. Mientrastanto, alagad maski dae na naglangkaw an sulfur dioxide emission asin volcanic kan Kanlaon (presenteng nasa Alert level 3), dae pa man soboot salbado an palibot kaini.
Pigtalaan an PDZ kan Bulusan sa 4km, mantang 6 km man sa Kanlaon.
Nagtitinir man na nasa Alert Level 1 an Taal sa Batangas asin Mayon sa Albay, na boot sabihon igwang hababang lebel kan pag-aalburuto.
Mientrastanto, sigun sa Office of the Civil Defense (OCD), nasa 27,000 na indibidwal gikan sa apat na banwaan asin 19 barangay sa Sorsogon an naapektaran kan pagputok kan Bulusan.
Labing nasa 60 katawo na man an presenteng nasa evacuation centers.
Labi 200, 000 food packs man gikan sa Department of Social Welfare and Development (DSWD) an naitao na, mantang igwang naka standby pang 200,000 food packs komo parte man kan direktiba kan Presidente na siertuhonh igwang bastanteng relief goods para sa mga naapektaran kan sakuna.
