Pigpuonan na kasuudma an Physical Fitness Training kan mga overweight na mga pulis kasunod kan naging direktiba ni Philippine National Police (PNP) Chief PGen. Nicolas Torre III na dapat magin physically fit an mga pulis para sa mas marhay na pagtatao nin serbisyong publiko sa mga Pilipino.
An mga overweight na pulis an tatawan nin 93 days para sa saindang weight and fitness challenge.
Tanganing magibo ini, pigkua komo fitness coach kan mga pulis si Rendon Labrador tanganing pangenota an nasambitan ng challenge asin maikasa an fitness trainings sa laog kan naibigay na palugit.
Enot kaining papapayaton an mga nasa himpilan kan Community Affairs and Detection Group (PCADG) kun saen an saiyang magiging batayan para sa progreso kan mga pulis an regular na pagtitimbang kada semana tanganing mahiling kun pirang kilo na an nabawas sa kani-kanilang timbang.
Marurumdoman, mismong si Torre na an nagsabi na dae magiging subject for promotion an mga pulis na overweight.
Tinawan-duon man ni Torre na naaayon man sa ley sa irarom kan Republic Act 6975 na dapat bakong halangkaw o hababa sa 5 kilograms gikan sa standard na timbang na iyo man dapat na naaayon sa saiyang edad asin kasarian an timbang kan mga pulis.
Posible man magpili kan saindang physical fitness program an mga pulis siring kan swimming, running o jogging, maski mga sports siring kan badminton asin maski golf.
Magiging mahigot man an hepe sa pagpapautob nin mga fitness program asin pighayag na mayo dapat patawad sa mga pulis sa mismong aldaw kan physical fitness tests.
Mientrastanto, dae pa naisasapinal kun pirang beses sa sarong semana an magiging trainings kan mga pulis asin kung ano ang antas kan ehehisyo an gigibuhon para sa nasambitan ng pagsasanay.
Bukas man an kampo sa mga mawot makiparte sa mga training gikan sa manlaen-laen na regional offices asin posible soboot magbali sa paagi kan videocall.
